This web site needs javascript activated to work properly. Please activate it. Here are the instructions how to enable JavaScript in your web browser, Thanks.

logo MIS
დასახელებები
კომპანიები
აქტიური ნივთიერებები
ძებნის ინსტრუქცია
უნიფიცირებული
დასახელება:
	
მეტფორმინი
Metformin
ა.თ.ქ. კლასიფიკაცია:
	
 
A10BA02	
A საჭმლის მომნელებელი ტრაქტი და ნივთიერებათა ცვლა
	
10 პრეპარატები შაქრიანი დიაბეტის მკურნალობისათვის
	
B პერორალური ჰიპოგლიკემიური პრეპარატები
	
A ბიგუანიდები
ანოტაცია:
	
	
ფარმაკოლოგიური თვისება:
	
მეტფორმინი წარმოადგენს პერორალურ ჰიპოგლიკემიურ პრეპარატს ბიგუანიდების ჯგუფიდან (დიმეთილბიგუანიდი). მისი სავარაუდო მოქმედების მექანიზმი მდგომარეობს მის უნარში დათრგუნოს გლუკონეოგენეზი, თავისუფალი ცხიმოვანი მჟავების წარმოქმნა და ცხიმების დაჟანგვა. იგი არ ცვლის სისხლში ინსულინის რაოდენობას, მაგრამ მოქმედებს მის ფარმაკოკინეტიკაზე ერთი მხრივ შეკავშირებული ინსულინის თავისუფალ ინსულინთან თანაფარდობის დაქვეითებით, ხოლო მეორე მხრივ ინსულინისა და პროინსულინის თანაფარდობის გაზრდით. მასთან ერთად, იგი ხელს უწყობს კუნთების მიერ გლუკოზის უტილიზაციას, ზრდის ღვიძლში სისხლმიმოქცევას და აჩქარებს გლუკოზის გარდაქმნას გლიკოგენად. გარდა ამისა, მეტფორმინი იწვევს ანორექსიგენულ ეფექტს, რაც ეხმარება პაციენტებს დიეტის დაცვაში. იგი აქვეთებს ტრიგლიცერიდების, დაბალი და ძალიან დაბალი ლიპოპროტეიდების დონეს სისხლში, აუმჯობესებს სისხლის ფიბრინოლიზურ თვისებებს პლაზმინოგენის ქსოვილოვანი აქტივატორის ინჰიბიტორის დათრგუნვის ხარჯზე.
ფარმაკოკინეტიკა:
	
შეწოვა: პრეპარატი აბსორბირდება კუჭნაწლავის ტრაქტიდან. მისი მაქსიმალური კონცენტრაცია სისხლის პლაზმაში აღინიშნება მიღებიდან 2 სთ-ის შემდეგ. 6 სთის შემდეგ პრეპარატის შეწოვა მთავრდება კუჭ-ნაწლავის ტრაქტიდან და მისი კონცენტრაცია პლაზმაში თანდათან ქვეითდება. განაწილება: იგი პრაქტიკულად არ უკავშირდება პლაზმის ცილებს და გროვდება სანერწყვე ჯირკვლებში, ღვიძლში და თირკმელებში. მისი ორგანიზმიდან გამოყოფა წარმოებს თირკმელებით, ნახევრადგამოოყოფის პერიოდით - 1,5-4,5 სთ. თირკმელების ფუნქციის დარღვევის დროს შესაძლებელია პრეპარატის კუმულაცია.
ჩვენება:
	
II ტიპის შაქრიანი დიაბეტი თანმხლები ჭარბი წონის დროს (ინსულინდამოუკიდებელი), დიეტოთერაპიის არაეფექტურობის და ფიზიკური დატვირთვის არაეფექტურობის შემთხვევაში ინსულინის მოთხოვნილების შესამცირებლად და წონაში მომატების პრევენციის მიზნით.
დოზირება და მიღების წესი:
	
ინდივიდუალურია, იგი განისაზღვრება სისხლში და შარდში შაქრის შემცველობით. თერაპია იწყება დოზის თანდათანობითი მომატებით 1 აბით (0,5 გ) დღეღამეში. სისხლში შაქრის დონის მიხედვით პრეპარატის დოზა ერთ კვირიანი ინტერვალით იზრდება 2 აბამდე. მაქსიმალური დღეღამური დოზა შეადგენს 3, ზოგჯერ 4 აბს. აბების მიღება წარმოებს ჭამის დროს, დაუღეჭავად სითხესთან (1 ჭიქა წყალთან) ერთად. თუ დღეღამის დოზა აღემატება 1 აბს, იგი იყოფა 2-3 მიღებაზე. პრეპარატით მკურნალობის კურსი დგინდება ექიმის მიერ.
გვერდითი მოვლენები:
	
საჭმლისმომნელებელი სისტემის მხრივ: შესაძლებელია (განსაკუთრებით მკურნალობის დასაწყისში) პირში ლითონის გემო, გულისრევა, ღებინება, დიარეა, პრეპარატის დოზის თანდათან მომატებით და მისი ჭამის დროს დანიშვნის შემთხვევაში, აღნიშნული მოვლენები სწრაფად გაივლის. მკურნალობის კურსის შეწყვეტა ამ შემთხვევაში არ არის აუცილებელი, რადგანაც აღნიშნული მოვლენები გაივლის პრეპარატის დოზის შეცვლის გარეშე. ალერგიული გამონაყარი კანზე გვხვდება იშვიათ შემთხვევებში. ძალიან იშვიათად აღინიშნება რძის მჟავას მიერ გამოწვეული აციდოზი.
უკუჩვენება:
	
- მომატებული მგრძნობელობა პრეპარატის ან მასში შემავალი კომპონენტების მიმართ; - ღვიძლისა და თირკმელების ფუნქციის დაქვეითება; - შაქრის ცვლის დარღვევა ცნობიერების დაქვეითებით ან პირიქით, აგრეთვე სისხლის მჟავე-ტუტოვანი წონასწორობის გადახრით მჟავიანობისკენ (ნივთიერებათა ცვლის აციდოზური დეკომპენსაცია, პრეკომა, ჰიპეროსმოლარული ან კეტოაციდოზური დიაბეტური კომა) ან მათ გარეშე; - გულ-სისხლძარღვთა სისტემის და ფილტვების ფუნქციის დაქვეითება; - ორგანიზმის ქსოვილებში ჟანგბადის დეფიციტი (ჰიპოქსიური მდგომარეობა); - თვალის ბადურას დიაბეტური დაზიანება შედარებით დაგვიანებულ სტადიაში; - მძიმე ინფექციები; - ოპერაციები, ტრავმები; - კატაბოლური მდგომარეობები, მაგალითად, სიმსივნური დაავადებები; - ორსულობა და ლაქტაციის პერიოდი; - ალკოჰოლიზმი; - ინსულინდამოკიდებული შაქრიანი დიაბეტი I ტიპის; - დიეტის დაცვა საკვების კალორიულობის შეზღუდვით (<1000 კკალ დღეში); - პრეპარატის გამოყენება ბავშვებში წინააღმდეგნაჩვენებია.
განსაკუთრებული მითითებები:
	
მკურნალობის დაწყებამდე და მკურნალობის პროცესში, ყოველ ნახევარ წელიწადში, საჭიროა ღვიძლისა და თირკმელების ფუნქციის შემოწმება. წელიწადში ორჯერ რეკომენდებულია სისხლში ლაქტატის დონის შემოწმება. აუცილებელია მკურნალობის კურსის შეცვლა სხვა ჰიპოგლიკემიური საშუალებით (მაგალითად, ინსულინით) 2 დღით ადრე რენტგენოლოგიური გამოკვლევის წინ რენტგენოკონტრასტული ნივთიერების გამოყენებით და ასევე ოპერაციამდე ზოგადი ნარკოზით. მკურნალობა შერჩეული პრეპარატით გრძელდება გამოკვლევის ან ოპერაციის შემდეგ 2 დღის განმავლობაში. მასთან ერთად სხვა ჰიპოგლიკემიური პრეპარატებით კომბინირებული თერაპიის დროს, ჰიპოგლიკემიის განვითარების გამო, ირღვევა ტრანსპორტისა და ტექნიკის მართვის შესაძლებლობა.
ჭარბი დოზირება:
	
ჭარბი დოზირების შემთხვევაში შესაძლებელია რძის მჟავას მიერ გამოწვეული აციდოზის განვითარება, რომლის სიმპტომებია: გულისრევა, ღებინება, დიარეა, მუცლის ტკივილი, საერთო სისუსტე, კუნთების ტკივილები, სუნთქვის გახშირება, ცნობიერების დაბინდვა და გონების დაკარგვა. აღნიშნული ჩივილების გამოვლენის შემთხვევაში, აუცილებელია ექიმთან კონსულტაცია.
ურთიერთქმედება სხვა მედიკამენტებთან:
	
პრეპარატის ჰიპოგლიკემიური მოქმედების ეფექტი ძლიერდება სხვა ანტიდიაბეტურ პრეპარატებთან, ტკივილდამაყუჩებელ და ანთების საწინააღმდეგო, დეპრესიის საწინააღმდეგო, ბაქტერიული ინფექციების სამკურნალო, აგრეთვე სისხლის წნევის დამწევ საშუალებებთან მისი კომბინაციით. ამის შედეგად შეიძლება განვითარდეს ჰიპოგლიკემია. მეტფორმინის ერთდროული დანიშვნით გლუკოკორტიკოსტეროიდებთან, ჰორმონულ კონტრაცეპტივებთან, ადრენალინთან, ასთმის საწინააღმდეგო პრეპარატებთან, გლუკაგონთან, ფარისებრი ჯირკვლის ჰორმონებთან, ფენოთიაზინის წარმოებულებთან, თიაზიდურ დიურეზულ საშუალებებთან, ნიკოტინის მჟავას წარმოებულებთან, სუსტდება პრეპარატის ჰიპოგლიკემიური მოქმედების ეფექტი. იშვიათ შემთხვევებში, პრეპარატის კომბინაციით სულფანილშარდოვანას წარმოებულებთან, სისხლში შაქრის შემცველობა მნიშვნელოვნად ქვეითდება. ციმეტიდინის გამოყენება აძლიერებს რძის მჟავას მიერ გამოწვეული აციდოზის განვითარების რიკს.







facebook
© შპს “საინფორმაციო-სამედიცინო სამსახური”
თბილისი, ჭავჭავაძის გამზ. 55
+(032)2 252272
infomis04@gmail.com
info@mis.ge

Page generation time: 0. 020646824 sec.