This web site needs javascript activated to work properly. Please activate it. Here are the instructions how to enable JavaScript in your web browser, Thanks.

logo MIS
დასახელებები
კომპანიები
აქტიური ნივთიერებები
ძებნის ინსტრუქცია
უნიფიცირებული
დასახელება:
	
თეოფილინი
Theophylline
ა.თ.ქ. კლასიფიკაცია:
	
 
R03DA04	
R სასუნთქი სისტემა
	
03 პრეპარატები ბრონქული ასთმის მკურნალობისათვის
	
D სხვა პრეპარატები სისტემური გამოყენებისათვის ბრონქული ასთმის მკურნალობისათვის
	
A ქსანტინის წარმოებულები
ანოტაცია:
	
	
ფარმაკოლოგიური თვისება:
	
თეოფილინი ხასიათდება მკვეთრად გამოხატული ბრონქოლიზური მოქმედებით. (აფართოვებს დაავადების შედეგად შევიწროვებულ ბრონქებს). იგი ხელს უშლის ბრონქების ობსტრუქციას. ფილტვების ფუნქციის მკვეთრი გაუმჯობესებით ხელს უწყობს არტერიული სისხლის ჟანგბადით გამდიდრებას. პრეპარატი იწვევს სუნთქვის ცენტრის სტიმულაციას, ამცირებს ფილტვისმიერ წინააღმდეგობას, ამცირებს წნევას სისხლის მიმოქცევის მცირე წრეში, აუმჯობესებს დიაფრაგმის შეკუმშვას, აძლიერებს მუკოცილიარულ კლირენსს. ხასიათდება გულის კუნთზე დადებითი ინოტროპული და ქრონოტროპული მოქმედებით. იგი აძლიერებს ქსოვილებში ც-ამფ დაგროვებას, რაც ხელს უწყობს გლუვ-კუნთოვანი მუსკულატურის კუმშვადობის აქტივობის დაქვეითებას. იგი აფერხებს პოხიერი უჯრედებიდან ალერგიის მედიატორების გამონთავისუფლების პროცესს. ახასიათებს პერიფერიულ ვენებზე სპაზმოლიზური მოქმედება, აძლიერებს თირკმელებში სისხლის მიმოქცევას, აქვს ზომიერად გამოხატული დიურეზული ეფექტი. აფართოვებს სისხლძარღვებს (ძირითადად თავის ტვინის, კანის და თირკმელების სისხლძარღვებს), თრგუნავს თრომბოციტების აგრეგაციას. შიგნით მიღებისას კარგად შეიწოვება კუჭნაწლავის ტრაქტში. რეტარდ-კაფსულებიდან აქტიური ნივთიერების შენელებული გამონთავისუფლების პროცესი ხელს უწყობს თეოფილინის გარკვეული დოზით შენარჩუნებას სისხლის პლაზმაში 12 სთ-ის განმავლობაში. რეტარდ-პრეპარატის ბრონქოლიზური მოქმედება შედარებით ნელა მიმდინარეობს, რის გამოც იგი არ ენიშნებათ სწრაფი მდგომარეობების კუპირებისათვის. თეოფილინის ფარმაკოკინეტიკა 350მგ-იანი დოზით მიღებისას, პლაზმაში მაქსიმალურ კონცენტრაციას აღწევს 6.3-8.8სთ-ის განმავლობაში, რომელიც შეადგენს 4.4მგ/მლ-ს. პრეპარატის თერაპიული კონცენტრაცია აღინიშნება რამოდენიმე დღის შემდეგ და შეადგენს 8-20მგ/მლ-ს. ტეოფილინი მეტაბოლიზდება ძირითადად ღვიძლის მიკროსომული ფერმენტების საშუალებით. მის ერთ-ერთ მეტაბოლიტს წარმოადგენს ბრონქოდილატაციური აქტივობის მქონე 3-მეთილქსანტინი. თეოფილინი და მისი მეტაბოლიტები ორგანიზმიდან გამოიყოფიან თირკმელების საშუალებით.
ჩვენება:
	
- ბრონქული ასთმა (შეტევების თავიდან აცილება და სისტემატური მკურნალობა); სხვადასხვა ეთიოლოგიის ბრონქოსპაზმის სიმპტომატური მკურნალობა (მათ შორის: ფილტვების ქრონიკული ობსტრუქტიული დაავადებები, ქრონიკული ბრონქიტი, ფილტვების ემფიზემა), ფილტვისმიერი ჰიპერტენზია, ჩეინ-სტოქსის ტიპის სუნთქვა, ღამის აპნოე, შაკიკი, თავის ტვინში სისხლმიმოქცევის მოშლა.
დოზირება და მიღების წესი:
	
პრეპარატის დოზა ინდივიდუალურია. მოზრდილებში სადღეღამისო დოზა შეადგენს 40მგ/კგ-ს, ხოლო ბავშვებში-20მგ/კგ ს. პირველი 3 დღის განმავლობაში ენიშნებათ პრეპარატის 1 კაფსულა ყოველი 12 სთ-ის განმავლობაში. 3 დღის შემდეგ, პრეპარატის კარგი ამტანობის პირობებში, დოზა შეიძლება გაიზარდოს. არასასურველი ეფექტების შემთხვევაში საჭიროა დოზის შემცირება. თეოფილინი 200 ენიშნებათ 20კგ-ზე მეტი სხეულის წონის მქონე ბავშვებს, აგრეთვე მსუბუქი წონის მქონე მოზრდილებს. თეოფილინი 350 ენიშნებათ მოზრდილებსა და ბავშვებს, რომელთა სხეულის წონა აღემატება 40კგ-ს. პრეპარატს იღებენ ჭამის შემდეგ მცირეოდენ სითხესთან ერთად.
გვერდითი მოვლენები:
	
ც.ნ.ს. მხრივ: თავის ტკივილი, უძილობა, მომატებული აგზნებადობა, ტრემორი, დიურეზის გაძლიერება, იშვიათად კრუნჩხვები (განსაკუთრებით ბავშვებში); კუჭ-ნაწლავის ტრაქტის მხრივ: კუჭის ლორწოვანი გარსის გაღიზიანება, ტკივილები ეპიგასტრიუმის არეში, გულისრევა, ღებინება, დიარეა; გულ-სისხლძარღვთა სისტემის მხრივ: პულსის გახშირება, არითმია, არტერიული წნევის დაქვეითება, გულის უკმარისობა, სტენოკარდია; საშარდე სისტემის მხრივ: დიურეზის გაძლიერება; ალერგიული რეაქციები: გამონაყარი კანზე და ქავილი. ამ შემთხვევაში საჭიროა პრეპარატის დოზის შემცირება. იმ შემთხვევაში, როდესაც პრეპარატისკონცენტრაცია სისხლის პლაზმაში აღემტება 20მგ/მლ-ს, იზრდება გვერდითი მოვლენების სიხშირე.
უკუჩვენება:
	
- პრეპარატის, მასში შემავალი ინგრედიენტების ან ქსანტინის წარმოებულების (კოფეინი, თეობრომინი, პენტოქსიფილინი) მიმართ მომატებული მგრძნობელობა; - ეპილეფსია, გულის მწვავე ინფარქტი, ექსტრასისტოლია, მწვავე ტაქიარითმია, გლაუკომა (თვალშიდა წნევის მომატება), კუჭისა და 12-გოჯა ნაწლავის წყლულოვანი დაავადება, განსაკუთრებით გამწვავების ფაზაში.
ორსულობა და ლაქტაცია:
	
პრეპარატის დანიშვნა ორსულებში (პირველ ტრიმესტრში და ბოლო კვირას), შესაძლებელია მხოლოდ განსაკუთრებული ჩვენებების მიხედვით. ლაქტაციის პერიოდში პრეპარატის დანიშვნის დროს უნდა გავითვალისწინოთ, რომ თეოფილინი გამოიყოფა დედის რძესთან ერთად. პრეპარატი უარყოფით გავლენას არ ახდენს ავტომობილის მძღოლებსა და იმ პირებზე, რომელთაც მუშაობა უხდებათ სხვადასხვა დანადგარებთან.
განსაკუთრებული მითითებები:
	
9 წლის ასაკამდე ბავშვებს პრეპარატი ექიმის მკაცრი მეთვალყურეობის ქვეშ ეძლევათ, რადგან ბავშვებში პრეპარატის ზუსტი დოზირება ძნელად განსახორციელებელია. პრეპარატი სიფრთხილით ენიშნებათ გულსისხლძარღვთა სისტემით (მძიმე ფორმის სტენოკარდია, მიოკარდის ინფარქტი, გულის უკმარისობა, გულის რითმის სერიოზული დარღვევები, ჰიპერტონული დაავადება, ჰიპერტროფიული კარდიომიოპათია) დაავადებულ ავადმყოფებს, აგრეთვე ჰიპერ-თირეოზის დროს, მკვეთრად გამოხატული ღვიძლისა და თირკმელების ფუნქციის დარღვევის მქონე ავადმყოფებს. ყურადსაღებია, რომ პრეპარატის თერაპიულ მოქმედებაზე გავლენას ახდენს სიგარეტის მოწევა.
ჭარბი დოზირება:
	
მოზრდილებში: კრუნჩხვები, ტემპერატურის მომატება, გულის მუშაობის დარღვევა. ბავშვებში: მომატებული აგზნებადობა, ფსიქიკის მოშლა, ტემპერატურის მომატება, ღებინება, კრუნჩხვები, პულსის გახშირება, არტერიული წნევის დაქვეითება, სუნთქვის მოშლა. მკურნალობა ტარდება მხოლოდ სტაციონარულ პირობებში. პირველ რიგში ხდება კუჭის ამორეცხვა და ორგანიზმისათვის სასიცოცხლოდ აუცილებელი ფუნქციების შენარჩუნება.
ურთიერთქმედება სხვა მედიკამენტებთან:
	
თეოფილინის თერაპიული ეფექტი ქვეითდება მასთან ერთად საძილე საშუალებების (ფენობარბიტალი), კრუნჩხვების საწინააღმდეგო საშუალებების (ფენიტოინი, კარბამაზეპინი), ანტიტუბერკულოზური საშუალებების (რიფამპიცინი), ანტაციდური პრეპარატების ერთდროული გამოყენებით. ზოგიერთი სამკურნალო საშუალებები აძლიერებენ თეოფილინის თერაპიული მოქმედების ეფექტს: ორალური ჩასახვის საწინააღმდეგო საშუალებები, მაკროლიდების ჯგუფის ანტიბიოტიკები, ალოპურინოლი, ბეტა-ადრენობლოკატორები, ციმეტიდინი, იზოპრენალინი, ლინკომიცინი. სერიოზული გვერდითი მოვლენების თავიდან აცილების მიზნით, თეოფილინთან ერთად, ეფედრინის, იზოპრენალინის, ადრენალინის და კოფეინის შემცველი პრეპარატების გამოყენება არ შეიძლება. თეოფილინი გორგლოვან ფილტრაციის გაზრდით და მილაკოვანი რეაბსორბციის შემცირებით აძლიერებს დიურეზული საშუალებების მოქმედების ეფექტს. თეოფილინი სიფრთხილით ენიშნებათ ანტიკოაგულანტებთან კომბინაციაში.







facebook
© შპს “საინფორმაციო-სამედიცინო სამსახური”
თბილისი, ჭავჭავაძის გამზ. 55
+(032)2 252272
infomis04@gmail.com
info@mis.ge

Page generation time: 0. 022128771 sec.